Náttúrugripasafnið

Í 12 kerjum eru að jafnaði allar helstu tegundir nytjafiska, sem veiðast við Ísland, auk krabba, sæfífla, krossfiska og skeldýra. Í kerjunum er 6°C heitur sjór, sem dælt er úr borholu af 30m dýpi, örfáum metrum frá safninu. Sjórinn er tandurhreinn við að hafa síast gegnum hraun og sand.

Árlega hrigna nokkrar tegundir sjávardýra í safninu og gefst þá gestum kostur á að fylgjast með klaki. Hjá tröllakrabbanum tekur ástarlífið langan tíma. Karlinn, sem er mun stærri en kvenkrabbinn, tekur hana í „fangið" og heldur henni í allt að þrjá mánuði áður en hún þýðist við hann og alvaran hefst. Meiri tilþrif eru í ástarlífi grásleppunnar og rauðmagans. Rauðmaginn eldroðnar af ást þegar hann hittir hrognafulla grásleppu. Hann vísar henni á góðan stað í kerinu til að hrygna og ef hún samþykkir staðinn, hrygnir hún fljótlega. Fjöldi hrogna getur verið 100-200 þúsund. Þau límast saman í kökk og festast við steina á botninum og tekur þá rauðmaginn við og gætir þeirra á meðan þau eru að klekjast út, en klakið tekur um 2-3 vikur. Ver hann þau af mikilli hörku, grásleppan fær ekki einu sinni að nálgast þau, og allan tímann sem rauðmaginn er yfir hrognunum, sér hann um að þeim berist nægilegt súrefni, hreyfir eyrugga og púar í þau. Rauðmaginn er svo upptekinn við gæslu- og uppeldisstörf, að hann gefur sér ekki tíma til að matast, og verður að lokum grár og gugginn. Í fyllingu tímans fyllist kerið af litlum seiðum, sem eru gegnsæ og um 5 mm löng. Þegar seiðin setjast á gler kersins, má sjá hjartað slá í þessum nýju lífverum.

Alls hafa sést á Íslandi um 300 tegundir fugla, þar af eru um 70 sem verpa hér á landi. Í Vestmannaeyjum verpa um 30 tegundir að jafnaði. Ber þar mest á sjófuglum, sem eru í milljóna tali. Þrjár tegundir fugla hafa til skamms tíma ekki orpið annars staðar á landinu en hér í Eyjum, þ.e. skrofa, litla-sjósvala og stóra-sjósvala.

Í Ejum má, vor og haust, sjá alla íslenska farfugla, eins verður vart margra fugla langt að kominna, svokallaða flækingsfugla, bæði frá Evrópu og Ameríku.

Á safninu eru flestir íslensku varpfuglarnir uppsettir, svo og mikill fjöldi áðurnefndra flækingsfugla, og eru nokkrir þeirra þeir fyrstu á landinu. Þá eru í safninu egg nær allra íslenku varpfuglanna. Einnig eru mörg litaafbrigði af sjófuglum, t.d. er þar aldökk langvía, en það er eina eintakið í heiminum sem viðtar er um.

Í fuglasalnum eru auk fugla uppstoppaðir krabbar og fiskar, margar tegundir mjög sjaldséðar eins og t.d. Lúsifer, Sædjöfull og Surtla, en það eru djúpsjávarfiskar sem halda sig að jafnaði á 1-2 þúsund metra dýpi.

Afgreiðslutími:
kl. 11.00-17.00 alla daga frá 15. maí til 15. september.
Frá 16.09 til 14.05 er safnið opið á sunnudögum frá kl. 15.00 til 17.00, einnig er hægt að heimsækja það eftir samkomulagi.
Nánari upplýsingar í síma 481 1997